O delegado territorial da Xunta en Pontevedra, Pablo Fernández, visitou hoxe o Balneario de Mondariz para coñecer de preto as actuacións realizadas grazas ás axudas da Xunta destinadas á mellora da eficiencia enerxética nos establecementos turísticos galegos.
O establecemento recibiu unha achega de case 110.000 euros, que se destinaron á renovación da iluminación, á substitución de electrodomésticos e á incorporación de sistemas de automatización, entre outras melloras.
Pablo Fernández destacou o compromiso da Xunta co sector turístico e a súa modernización, facilitando investimentos que potencian a competitividade e reducen o consumo enerxético.
Esta liña de axudas conta cunha dotación global de 9 millóns de euros para toda Galicia. Na provincia de Pontevedra, máis de 50 establecementos beneficiáronse destas subvencións, cun investimento total apoiado pola Xunta que supera os 3,2 millóns de euros.
No ámbito do Condado-Paradanta, as axudas permitiron apoiar dous establecementos: o propio Balneario de Mondariz e a Rectoral de Fofe, situada en Covelo.
O delegado territorial subliñou que estes investimentos contribúen a un modelo turístico máis eficiente e sostible, axudando aos establecementos a reducir custos e a mellorar o servizo aos clientes.
