A competición, organizada pola Federación Internacional de Motociclismo e o Club Motomontañismo Arteixo, reunirá a uns 150 deportistas de aproximadamente 25 equipos nacionais de todo o mundo. Espérase unha asistencia de máis de 2.500 espectadores, ademais dun dispositivo de 500 persoas entre organización, xuíces e voluntarios.
Debido ás necesidades de montaxe e desenvolvemento da proba, o tráfico e o estacionamento na zona sufrirán diversas afectacións. O aparcadoiro do campo de fútbol permanecerá pechado dende a medianoite do xoves 24 de setembro ata as 22:00 do domingo 27.
Na avenida Arsenio Iglesias, o estacionamento estará prohibido no tramo entre o acceso á piscina municipal e o aparcadoiro do Centro Arteixo Innovación dende as 22:00 do xoves 24 ata as 22:00 do domingo 27. Ademais, dende as 16:00 do venres 25, haberá un corte de tráfico nesta mesma avenida, dende a rotonda ata a entrada do aparcadoiro de Gadis, que se manterá ata o remate do evento.
Na contorna do Campo da Festa, as restricións de estacionamento comezarán ás 16:00 do venres 25 e estenderanse ata as 22:00 do domingo 27.
O Concello de Arteixo recomenda á veciñanza que planifique os seus desprazamentos tendo en conta estas medidas durante a fin de semana da competición.
