O Goberno de España anunciou a aprobación dunha modificación do proxecto para a remodelación da avenida Alfonso Molina, principal arteria de acceso á cidade da Coruña. Esta decisión, motivada pola afectación a numerosos servizos soterrados, permitirá impulsar as obras a partir de setembro.
A nova comisión de seguimento, conformada hoxe, reunirá periodicamente ao Concello e á Demarcación de Carreteras para avaliar a evolución dos traballos. Pola parte municipal, participan o primeiro tenente de alcaldesa, José Manuel Lage, os concelleiros Jesús Celemín e Montse Paz, xunto a técnicos municipais. Pola Demarcación de Carreteras, asisten o xefe, Ángel del Río, e persoal responsable da obra.
José Manuel Lage destacou a importancia deste proxecto para a cidade e o compromiso do Concello para culminar a obra canto antes. Lembrou tamén que o Concello logrou a licitación da segunda fase das obras en maio, co obxectivo de que a integración paisaxística se realice en paralelo aos traballos actuais, acurtando así os prazos totais.
Segundo Lage, existe un compromiso do Goberno de España para adxudicar a segunda fase de Alfonso Molina no último trimestre do ano. "Agardamos que se cumpra, o que permitiría que o conxunto da obra [...] estivera rematado plenamente no primeiro trimestre de 2028", afirmou, subliñando a prioridade da Coruña para o goberno local.
A complexidade dos traballos débese á afectación de 21 servizos soterrados, o que requiriu unha modificación do proxecto xa aprobada polo Estado. Tras agosto, espérase que a execución avance de forma máis visible.
A actuación non só mellorará a capacidade e os accesos da avenida, senón que tamén a converterá nun espazo urbanizado acorde coa nova realidade da cidade, con novos barrios como Xuxán ou Someso nas súas marxes, que requiren un tratamento máis coidado, zonas verdes e sendas peonís.
