A exposición busca ofrecer ao público unha experiencia enriquecida e interactiva para coñecer o ser humano dende novas perspectivas a través da IA. A iniciativa conta coa colaboración da Fundación Española para la Ciencia y la Tecnología (FECYT), dependente do Ministerio de Ciencia, Innovación y Universidades.
Os cinco xogos interactivos permiten explorar aplicacións da IA en campos como a arte ou a bioloxía, así como comprender os seus procesos de aprendizaxe. No módulo «Historia da IA», unha liña do tempo visual e lúdica permite ao público percorrer os fitos máis importantes da Intelixencia Artificial e o seu impacto na nosa forma de vivir, traballar, aprender e comunicarnos.
Outros módulos inclúen «Emocionarte», onde un modelo de IA xenerativa transforma emocións seleccionadas polo usuario nunha obra de arte abstracta; «Deseña unha proteína», un xogo arcade que ensina como a IA axuda no deseño de novas proteínas para a investigación; «O espello es ti», que permite explorar a identidade a través de indumentarias tradicionais; e «Redes en xogo», que compara a aprendizaxe do cerebro humano coas redes neurais artificiais na interpretación de patróns.
O concelleiro de Cultura e Turismo, Gonzalo Castro, destacou estas novidades divulgativas como un exemplo do papel da Domus como "motor de difusión científica e coñecemento que sempre está na vangarda", visibilizando o impacto positivo da Intelixencia Artificial na sociedade cando é regulada e aplicada correctamente.
