A proposta, impulsada polo Concello da Coruña, busca que todos os taxis da cidade poidan operar sen restricións en toda a área metropolitana, incluíndo o aeroporto de Alvedro. O portavoz municipal, José Manuel Lage Tuñas, destacou que esta medida permitirá incrementar os servizos dispoñibles para a cidadanía e mellorar a capacidade dos taxis para competir cos vehículos de transporte con condutor (VTC).
“"Isto tamén permitirá aos taxis competir cos VTC en toda a área metropolitana e incrementar así os servizos aos cidadáns, tamén no aeroporto."
Pola súa banda, o alcalde de Culleredo, José Ramón Rioboo, mostrouse favorable á iniciativa, pero subliñou a necesidade dun informe socioeconómico exhaustivo. Este estudo debería determinar os municipios a incluír e avaliar o rendemento para o colectivo de taxistas, así como as melloras no servizo para os veciños.
“"Consideramos que unha visión metropolitana pode ser adecuada para ofrecer un mellor servizo, pero é imprescindible actuar en base a un informe técnico rigoroso que marque a folla de ruta a seguir para que o resultado traia beneficios reais para a cidadanía da área."
Estas consideracións xurdiron durante a comisión de seguimento do convenio regulador dos taxis en Alvedro, celebrada o martes. No encontro participaron, ademais de Lage e Rioboo, a directora xeral de Mobilidade, Judit Fontenla, e representantes das asociacións de taxis de ambos os dous municipios. Acordouse tamén que, durante o peche temporal do aeroporto de Lavacolla entre o 23 de abril e o 27 de maio, todos os taxistas da Coruña poderán operar en Alvedro.
