O festival converterá a urbe nun punto de encontro internacional para as linguas, culturas e industrias audiovisuais das nacións celtas. A elección da Coruña chega despois de que trece producións galegas fosen nomeadas aos premios na edición anterior.

Impulsado pola TVG, o Clúster do Audiovisual Galego e diversas institucións patrocinadoras, o evento reunirá a profesionais, produtores, creadores e directivos de medios de territorios como Escocia, Irlanda, Gales, Bretaña, Cornualles e a Illa de Man.

O programa inclúe conferencias, sesións de networking, foros profesionais e a entrega dos prestixiosos Torc Awards for Excellence, recoñecementos clave no sector audiovisual e radiofónico das nacións celtas. O festival promove a creación audiovisual en linguas minorizadas e a diversidade cultural, con participación de plataformas como BBC, RTÉ, TG4, S4C, MG ALBA e France 3 Bretagne.

A presenza galega nos últimos anos neste certame foi significativa, con candidaturas en ficción, longametraxes, documentais, programas de entretemento, contidos infantís e proxectos radiofónicos.