A vista preliminar celebrada este venres para tentar alcanzar unha sentenza de conformidade no caso do violento asalto a unha vivenda en Vilameá (Lobios) en xaneiro de 2025 rematou sen éxito. A división entre os cinco acusados, que compareceron por videoconferencia dende tres prisións distintas, impediu selar un acordo co fiscal e a avogada da acusación particular, polo que o caso se dirixirá a xuízo oral, sinalado para o próximo 5 de outubro, aínda que a porta a negociacións de última hora permanece aberta.

O principal obstáculo para a sentenza de conformidade foi a negativa dun dos acusados, que paradóxicamente foi clave para esclarecer os feitos ao confesar dende o momento da súa detención. O seu avogado argumenta a vulneración de dereitos fundamentais nun recurso pendente ante o Constitucional e solicitou a súa excarceración tras 15 meses en prisión, pero a xuíza denegouna por risco de fuga.

Así mesmo, a defensa do suposto xefe do grupo criminal, considerado o ideólogo, necesita máis tempo para ultimar detalles que acrediten a súa adicción ás drogas. Este acusado, que tamén colaborou coas autoridades achegando datos do asalto, desvinculouse del. A súa parella sentimental é irmá dun dos outros implicados.

As peticións iniciais da fiscalía e da acusación particular sumaban penas de ata 14 anos de prisión. A proposta de conformidade ofrecía unha rebaixa significativa, a case cinco anos, a cambio de que os acusados abonasen de forma solidaria a responsabilidade civil reclamada pola acusación particular, que supera os 56.000 euros só por lesións e secuelas, ademais dos 6.000 euros en efectivo e o valor das xoias e teléfonos roubados.

A defensa dun dos acusados xa argumentara que o seu cliente só actuou como vixilancia exterior e non participou na agresión, solicitando a súa absolución do delito de lesións e que non se lle responsabilizase civilmente dos danos físicos da vítima, limitando a súa participación a cómplice do roubo.

A defensa do suposto líder tamén intentou introducir anoxe a drogadicción como circunstancia atenuante, alegando que o seu consumo afectaba a súa capacidade cognitiva na data dos feitos e solicitando informes de comunidades terapéuticas para acreditar a súa adicción.

O xuízo fixado para outubro examinará os feitos ocorridos a noite do 19 de xaneiro de 2025. Segundo as acusacións, o grupo asaltou a vivenda dun empresario crendo que albergaba unha gran suma de diñeiro. A vítima foi agredida no garaxe, sufrindo traumatismos severos, fracturas costais e secuelas neurolóxicas. O botín incluíu 6.000 euros en metálico, xoias, dous teléfonos móbiles e unha escopeta recortada.