A profesora do Departamento de Lingua Española Rosa Pérez Rodríguez é a única candidata ao decanato da Facultade de Filoloxía e Tradución. As eleccións celebraranse o vindeiro 28 de outubro, e nelas poderán votar 92 persoas: 80 docentes, sete estudantes e cinco membros do Persoal Técnico de Xestión e Administración de Servizos (PTXAS). De ser elixida, Pérez substituirá no cargo o catedrático José Montero Reguera, quen lidera o centro desde 2020.
Esta non será a primeira vez que Pérez asuma esta responsabilidade, xa que dirixiu a facultade entre 2009 e 2016. A súa paixón pola xestión universitaria levouna tamén a ser directora do Departamento de Lingua Española en dúas ocasións. "Ao ver que a sucesión era tan complicada e tendo en conta que a min me gusta o mundo da xestión decidinme a dar o paso", explica Pérez, quen recoñece que o ideal sería unha persoa máis nova, pero que a súa experiencia achega valor.
A candidatura preséntase cun equipo que Pérez define como "moi novo, pero de persoas moi comprometidas e con moitas ganas de axudar". A ela acompañarán como vicedecanas Valentina Marta Rodríguez, María Platas Alonso, Rocío Hernández Arias e José Carregal Romero, mentres que Liliana Valado Fernández asumirá a secretaría.
Entre os obxectivos máis inmediatos figura a implantación da modalidade virtual do Grao en Filoloxía Aplicada Galega e Española para o vindeiro curso, así como unha modificación do Grao en Linguas Estranxeiras para incorporar tamén a docencia virtual. Pérez considera "importante aprender, organizar cursos de formación, etc." para que o persoal se adapte a esta nova modalidade de ensino.
Outro dos asuntos prioritarios será a reforma do Grao en Tradución e Interpretación. Pérez sinala a necesidade de reflexionar sobre a titulación ante o desenvolvemento da Intelixencia Artificial, desmentindo a idea de que os tradutores xa non son precisos. "Aínda que considera que a profesión segue a ser igual de necesaria, apunta tamén á importancia de formular esta mensaxe de maneira clara para a sociedade", cualificando esta cuestión de "absolutamente estratéxica".
Ademais, Pérez sitúa entre os desafíos da facultade a captación de alumnado e a necesidade de visibilizar o valor social das humanidades, co propósito de "ser quen de sacar o centro adiante" e amosar que "as humanidades seguimos sendo útiles e tamén moi necesarias".
Pola súa banda, o actual decano, José Montero Reguera, amosa "razoablemente satisfeito co labor desenvolvido" durante os seus sete anos á fronte do centro, destacando o fortalecemento interno e a visibilidade exterior da facultade. Subliña o fortalecemento da oferta académica, con tres graos cun 70% de matrícula e sete mestrados con resultados "excelentes", así como a superación de todas as avaliacións e certificacións requiridas.
Montero tamén destaca o "importante esforzo" en captación de estudantes e na organización de actos para achegar as actividades á cidade. Recoñece que "o camiño non foi sinxelo nin doado", pero agradece o apoio do seu equipo e do centro. "Coido que deixo unha facultade mellor da que eu recibín", conclúe, desexando ao novo equipo "o mellor para facer da facultade un lugar agradable para desenvolver a nosa vida académica".
