A delegada territorial da Xunta en Vigo, Ana Ortiz, e a alcaldesa de Mos, Nidia Arévalo, xunto á subdirectora de Enfermería da área sanitaria viguesa, Carmen Soto, visitaron o Colexio Lar en Mos, onde xa recibiron a vacina intranasal 425 escolares. Esta iniciativa forma parte da segunda edición do proxecto piloto de vacinación antigripal escolar que se está a desenvolver en 75 centros educativos de Galicia.
Na área sanitaria de Vigo, participan un total de 11 colexios: na cidade olívica están implicados o CEIP García Barbón, o CEIP Lope de Vega, o CEIP Pintor Laxeiro, o CEIP Seis do Nadal, o CPR Plurilingüe Apóstol Santiago e a EEI Vila Laura. Ademais, a campaña esténdese a outros municipios como Moaña (CEIP Plurilingüe de Reibón), Mos (CPR Plurilingüe Lar), O Rosal (CRA María Zambrano), Salceda de Caselas (CRA Raíña Aragonta) e Salvaterra de Miño (CEIP Plurilingüe Infante de Borbón).
A campaña de vacinación fronte á gripe e á covid-19 iniciouse o pasado 28 de setembro nas residencias de maiores e centros sociosanitarios. As seguintes fases inclúen a vacinación de persoas de 70 ou máis anos e profesionais sanitarios a partir do luns 19 de outubro, seguida pola de embarazadas o 2 de novembro e persoas maiores de 60 anos o 9 de novembro.
