A Universidade de Vigo regresou ao espazo este xoves 1 de outubro co experimento CORTIS (Camara Observation & Radiation Test in Space), desenvolvido polo alumnado da asociación UVigo SpaceLab. O lanzamento realizouse desde a base da Forza Espacial de Vanderberg (California) ás 20:22 horas a bordo dun vehículo Falcon 9 de SpaceX.
O experimento CORTIS está integrado na plataforma orbital OSSIE, deseñada e fabricada pola empresa de Nigrán UARX Space. A plataforma separouse do lanzador e quedou liberada en órbita ás 21:41 horas. CORTIS permitirá testar e comparar os resultados de cámaras e sensores de radiación implementados no cubesat BIXO (Bacteriological Intercommunication Experiment in Orbit), comprobando así o correcto funcionamento do sistema.
Este regreso ao espazo prodúcese case oito anos despois do lanzamento do cubesat Lume-1. Os integrantes de UVigo SpaceLab consideran este feito “un fito da asociación, xa que permite consolidarnos dentro do sector aeroespacial. Xa non somos só un grupo de estudantes que ten ideas, senón un grupo de estudantes que consegue desenvolvelas e levalas do papel á orbita”, segundo detalla Daniel Collarte.
Tras a separación, o equipo de operacións de UARX Space iniciou a fase de operacións iniciais en órbita (LEOP). Durante esta fase, estableceranse e verificarán as comunicacións con OSSIE-D, avaliarase o estado do vehículo e analizarase a súa telemetría. A misión transporta, ademais do proxecto CORTIS, outras nove cargas e 16 satélites para demostracións tecnolóxicas.
O proxecto CORTIS, iniciado en xullo de 2024 e finalizado coa súa integración en xuño de 2025, foi posible grazas á colaboración con UARX Space. Permitiu a novos membros da asociación experimentar unha misión completa e impulsou o desenvolvemento de BIXO, validando tecnoloxías para futuras misións.
CORTIS recollerá datos sobre radiación en órbita, avaliando o rendemento de sensores comerciais fronte a tecnoloxías desenvolvidas por UVigo SpaceLab e validando unha cámara con flight heritage. Participaron neste proxecto medio cento de estudantes.
“O tratamento dos datos é realizado por UARX Space e nós recibímolos en paquetes como usuarios. En casos puntuais, poderemos descargar fotografías sacadas por CORTIS”, sinala Daniel Collarte. Estes datos son vitais para a misión biolóxica do cubesat BIXO, que estudará como a exposición prolongada ao ambiente espacial afecta a un cultivo bacteriano.
A cámara con flight heritage, que obterá imaxes do exterior de OSSIE e da Terra, será unha das cargas secundarias de BIXO, probando o seu funcionamento en órbita e a descarga de imaxes.
O deseño e construción de BIXO continúa coa integración e validación de subsistemas na sala limpa. Recibíronse case todas as pezas para a montaxe dos modelos de cualificación e voo, e realizaranse os ensaios correspondentes.
