Un proxecto financiado polo VI Plan Social Ence Pontevedra, levado a cabo polo grupo de investigación en Fisioterapia Clínica (FS1), busca determinar os beneficios do contacto coa natureza na saúde e benestar de persoas con afeccións cardiovasculares. A investigación céntrase en como as contornas naturais afectan o sistema nervioso autónomo, clave nos estados de estrés e relaxación, comparando os efectos dunha camiñada nunha carballeira e nun espazo máis aberto.
Os resultados preliminares deste estudo, que contou coa colaboración do Concello da Lama e da asociación Pontecorazón, serán presentados o vindeiro luns 9 de novembro ás 19:30 horas na sede da Vicerreitoría do campus. A sesión divulgativa, aberta á cidadanía, contará coa participación da investigadora principal do grupo FS1, Eva María Lantarón, e da fisioterapeuta Ana Gil, do grupo AF4 da Escola de Enxeñaría Forestal.
A investigación involucrou a preto de 30 persoas con patoloxía cardiovascular, que realizaron dúas camiñadas dun quilómetro. Unha tivo lugar nunha carballeira con "baixa apertura visual" e a outra nunha contorna "igualmente natural, pero moito máis aberta e cun solo máis uniforme". Comparáronse parámetros de variabilidade da frecuencia cardíaca, como o índice RMSSD, para coñecer que contorna xeraba unha maior resposta vagal, asociada á relaxación.
Un estudo de caso presentado recentemente nun congreso na Universidad de León, centrado nunha persoa con hipertensión arterial, suxire que o incremento da variabilidade cardíaca foi "descritivamente maior" na carballeira das Ermidas, no municipio da Lama. Estes achados suxiren que camiñar en contornas naturais con diferentes configuracións espaciais pode asociarse con respostas autonómicas distintas.
O encontro divulgativo, baixo o título "Natureza e saúde", tamén servirá para repasar o camiño percorrido polo grupo FS1, adscrito ao Instituto de Investigación Sanitaria Galicia Sur, nesta liña de investigación. O proxecto actual segue a un estudo anterior, tamén financiado polo Plan Social Ence, que avaliou a influencia das características das contornas forestais na regulación do sistema nervioso autónomo.
Ademais de presentar os resultados, a xornada recoñecerá a participación das persoas no estudo e abordará os beneficios xerais para a saúde do contacto e da actividade física na contorna natural, con especial énfase nas patoloxías cardiovasculares.
