O avance do último informe climatolóxico de MeteoGalicia sinala que outubro foi un período anómalo en Galicia, marcado pola maior frecuencia de altas presións e a escasa chegada de frontes atlánticas. Isto provocou que as temperaturas se mantivesen por riba dos valores normais e as precipitacións acumuladas fosen significativamente inferiores ao agardado.
A media das temperaturas estivo por riba do habitual, especialmente as máximas, debido ao predominio de situacións anticiclónicas que achegaron aire cálido do sur. Destacaron os altos rexistros acadados entre os días 9 e 15 do mes. En concreto, a temperatura media en Galicia foi de 15,5 graos, o que supón 1 grao máis que o valor normal, segundo datos de once estacións meteorolóxicas representativas. As temperaturas máximas máis altas rexistráronse nas ribeiras do Miño ourensán e os valores máis baixos das mínimas nas comarcas da Limia e de Verín, no Macizo Central e na Serra Calva.
En canto ás precipitacións, outubro só tivo tres xornadas de choiva xeneralizada pola chegada de frontes frías. O resto dos días foron secos ou rexistraron choivas tormentosas illadas no interior, afectando principalmente ao norte de Lugo e da Coruña. A precipitación media acumulada foi de 34 litros por metro cadrado, un 79% inferior aos datos habituais, segundo rexistros de 16 estacións meteorolóxicas. Este dato sitúa o mes como moi seco, sendo necesario remontarse ao ano 2007 para atopar un outubro máis seco.
Os maiores acumulados de precipitación rexistráronse nas serras da Faladoira e do Xistral e na ría de Foz, con valores de entre 90 e 150 litros/m². Pola contra, os máis baixos, entre 10 e 15 litros/m², localizáronse nas depresións de Ourense e da Limia, na área de Allariz, na serra do Larouco e no val do río Támega.
