A veciñanza de Arcade xa pode desfrutar da renovada praza de Talo Río, que transforma unha zona céntrica da vila nun lugar máis accesible, moderno, verde e humanizado. A actuación permitiu renovar por completo o espazo, resolver problemas no subsolo e mellorar a accesibilidade, eliminando barreiras arquitectónicas e separando redes de saneamento.
O alcalde, Manu Lourenzo, destacou a importancia da intervención, recoñecendo dificultades imprevistas no subsolo que demoraron os traballos. "Era necesario resolver esas cuestións para que o resultado final estivese á altura do que merece a veciñanza", explicou.
Lourenzo subliñou que a praza "conta con materiais de calidade, máis accesible, con espazos verdes e pensada para que as persoas poidan vivila e compartila", co obxectivo de que sexa un lugar de encontro e convivencia que tamén favoreza a actividade dos negocios da contorna.
Esta actuación forma parte do obxectivo municipal de avanzar cara a un centro urbano máis amable, onde o espazo público estea pensado para as persoas, mellore a calidade de vida e favoreza a relación co comercio local. O investimento total rolda os 1,2 millóns de euros, achegados polo Plan Extraordinario da Deputación de Pontevedra (700.000 euros) e fondos propios do Concello.
Coincidindo coa apertura, o Concello programou actividades culturais e de lecer para esta fin de semana. O sábado haberá un obradoiro de maxia (11:30h), o espectáculo familiar GaleRock no Camiño (17:30h) e o concerto de versións Desconcerto (19:30h). O domingo, a Banda Artística de Arcade ofrecerá un concerto (12:30h).
A actividade na nova praza continuará a vindeira semana coa celebración do Samaín, consolidando Talo Río como un novo punto de encontro cultural e festivo en Arcade.
