A veciñanza de Arcade xa pode desfrutar dun espazo público renovado, máis accesible e pensado para as persoas. Para celebrar a súa estrea, a praza acollerá diversas actividades culturais ao longo da fin de semana.
O sábado 24 de outubro comezará ás 11:30 h cun obradoiro de maxia impartido polo Mago Teto no local social de maiores, dirixido a persoas maiores de 55 anos. Pola tarde, ás 17:00 h, terá lugar o espectáculo familiar GaleRock no Camiño, tamén co Mago Teto, que combina maxia e rock en directo. A xornada completarase ás 19:30 h cun concerto de Desconcerto, con versións de pop e rock.
O domingo 25 de outubro, a programación continuará ás 12:30 h cun concerto da Banda Artística de Arcade. A actividade na praza de Talo Río proseguirá as vindeiras fins de semana coa celebración do Samaín.
