O Pleno do Concello de Mos, celebrado no Pazo de Mos, deu luz verde por unanimidade á moción que reclama un maior apoio á investigación e aos avances na enfermidade de Alzheimer. A iniciativa foi lida polo presidente de AFAGA Alzheimer, Juan Carlos Rodríguez, durante a sesión plenaria.
O texto aprobado subliña os recentes avances no diagnóstico e tratamento da enfermidade, e insta as administracións competentes a reforzar o apoio á investigación e ao desenvolvemento de novas terapias. Tamén se acordou promover a participación de pacientes en ensaios clínicos e garantir que os avances terapéuticos aprobados se incorporen ao Sistema Nacional de Saúde.
O Concello de Mos comprométese a adaptar os sistemas e servizos sanitarios ás novas necesidades derivadas destes avances, coa participación de profesionais sanitarios. A moción tamén garante a equidade e igualdade de acceso aos tratamentos, independentemente do lugar de residencia, e o reforzo dunha atención integral e sociosanitaria para pacientes e familias.
A aprobación por unanimidade permitiu reunir o apoio de todos os grupos municipais arredor dunha iniciativa que sitúa a investigación e a mellora da atención ás persoas con Alzheimer entre as cuestións a seguir abordando desde o ámbito institucional.
A iniciativa tamén recoñece o labor de AFAGA Alzheimer na atención, sensibilización, formación e promoción da investigación sobre a enfermidade.
