A iniciativa busca acompañar ás participantes nun proceso de autocoñecemento, recuperación da confianza e fortalecemento da súa autonomía. A alcaldesa de Mos, Nidia Arévalo, acompañada pola directora do CIM, Ana Rodríguez Cabaleiro, visitou ás participantes para coñecer de preto o desenvolvemento do programa.
RENACE ten como obxectivo axudar ás mulleres a reconectar consigo mesmas, recuperar a ilusión e descubrir as súas capacidades e fortalezas. A través de dinámicas grupais e experiencias compartidas, o programa fomenta que cada muller se sinta protagonista da súa vida, gañe confianza nas súas decisións e avance cara a unha maior autonomía persoal.
A metodoloxía é vivencial e grupal, destacando o acompañamento mutuo e a creación dunha rede de apoio entre as mulleres, combatendo así o illamento social. As actividades inclúen sendeirismo, reflexión persoal, fotografía e accións de autocoidado, combinando propostas creativas e saídas fóra do espazo habitual.
O programa articúlase en distintas etapas que abordan o autocoñecemento, a identificación de fortalezas, a confianza, o coidado persoal, a comunicación e a toma de decisións. O traballo colectivo é un pilar fundamental para consolidar unha rede de apoio que permita afrontar novas etapas con maior seguridade.
RENACE conta co financiamento da Xunta de Galicia, a través dunha subvención destinada á promoción da igualdade.
