O Consello da Xunta deu luz verde á licitación dos contratos para a redacción dos proxectos de urbanización de sete Proxectos de Interese Autonómico (PIA). Estes proxectos acollerán un total de 14.876 vivendas, das cales o 80% serán protexidas e o 20% restante de tipo libre.
O presidente autonómico, Alfonso Rueda, informou na rolda de prensa posterior ao Consello que os contratos xa contan coa aprobación inicial e que o importe da licitación ascende a 6.366.604,24 euros.
“"Os contratos xa teñen a aprobación inicial"
O contrato divídese en sete lotes, correspondentes a diferentes localizacións: Santiago de Compostela (Mallou, 3.609 vivendas), A Coruña (SUD Monte Mero, 4.397 vivendas), Arteixo (A Baiuca-A Penouqueira, 160 vivendas), Lugo (SR-5 Sagrado Corazón, 1.265 vivendas), Ourense (SU1 Escorial-Vinteún, 1.435 vivendas), Pontevedra (SB2-Fase II e SB5 San Mauro, 2.010 vivendas) e Vigo (SUB 405 Ofimático, 2.000 vivendas).
Segundo indicou o presidente galego, a Xunta prevé licitar o contrato esta mesma semana, abrindo un prazo dun mes para a presentación de ofertas por parte das empresas interesadas. O obxectivo é que as obras de urbanización poidan ser licitadas en 2027, unha vez se aproben os proxectos e se completen as adquisicións de terreos necesarias.
Ademais destes sete PIAs, o Goberno galego está a traballar noutros seis proxectos de urbanización en Vigo, Vilagarcía de Arousa, Marín, O Porriño, Ribadeo e Cangas.
