O director de Augas de Galicia, Roi Fernández, presentou hoxe ao alcalde de Gondomar, Francisco Ferreira, o proxecto definitivo para a construción dun novo viaduto na confluencia de ambos ríos. A actuación busca garantir a seguridade da poboación fronte ás crecidas e tamén mellorar as zonas de recreo fluviais.
A previsión é iniciar a licitación antes de finais deste ano, co obxectivo de adxudicar e comezar as obras no 2027. Mentres o Concello se encargará da dispoñibilidade dos terreos, Augas de Galicia asumirá a execución e o financiamento total do proxecto, que conta cun investimento de case 6 millóns de euros.
Ambos os responsables destacaron a importancia da colaboración institucional para levar a cabo unha obra desta magnitude, que beneficiará a máis de 15.000 persoas. Para minimizar as molestias durante os traballos, prevese un desvío provisional da estrada autonómica cun paso sobre o río Miñor, que manterá o tráfico activo.
O proxecto tamén inclúe a execución dun canal de alivio baixo o novo viaduto para a evacuación de caudais do río Zamáns ao Miñor en épocas de crecida. Ademais, deseñaranse dous paseos fluviais e dúas pasarelas peonís, incrementando as zonas de lecer nas contornas dos ríos.
