Esta actuación forma parte do Plan galego de reprodución humana asistida, cuxo obxectivo é mellorar as prestacións actuais e incorporar novas, coa finalidade de converter a carteira de servizos de Galicia na máis ampla a nivel estatal.
A adxudicación, publicada no Portal de Contratos Públicos, foi realizada á empresa IGLESIAS VEIGA ARQUITECTOS SLP. A reforma responde á necesidade de dar unha correcta cobertura sanitaria á poboación de referencia da área sur de Galicia, adaptando os espazos do centro da rede sanitaria pública galega.
Actualmente, a unidade de reprodución humana asistida atópase no Centro Integral de Saúde Taboada Leal. O seu traslado ao Hospital Meixoeiro permitirá a introdución de novas técnicas grazas a unha maior dispoñibilidade de salas.
A nova unidade situarase nun emprazamento contiguo ao bloque cirúrxico e á unidade de cirurxía maior ambulatoria para a zona de laboratorio e procedementos. As consultas, pola súa banda, situaranse na segunda planta ala 2, contigua ás consultas externas, que será o acceso para os pacientes.
