A Facultade de Historia do campus de Ourense acolleu este venres a VIII Xornada Olladas á Antigüidade, que baixo o título A muller e a relixión no mundo antigo, reuniu a especialistas de diferentes universidades estatais. Esta cita anual achega ao alumnado cuestións relacionadas co xénero nas culturas antigas de Próximo Oriente, Exipto, Grecia e Roma.
Organizada polo Grupo de Estudos de Arqueoloxía, Antigüidade e Territorio (GEAAT) da Universidade de Vigo, co financiamento da Unidade de Igualdade da UVigo, a xornada busca profundar en aspectos da historia antiga desde unha perspectiva de xénero. A coordinadora, Helena López, explicou que a edición de 2026 se centra no estudo das mulleres e a relixión, un ámbito onde a relixión permitiu ás mulleres desenvolver formas de participación e protagonismo.
A programación iniciouse coa conferencia O sagrado en feminino: mulleres, culto e poder no Próximo Oriente Antigo, de Sara Arroyo (Universidad Complutense de Madrid), quen percorreu o papel feminino nas primeiras civilizacións mesopotámicas, destacando figuras como as nadītu de Sippar ou a raíña Puduhepa. Revisou tamén o mito da ‘prostitución sacra’ para recuperar o protagonismo destas mulleres.
Seguiulle As mulleres e o culto aos ancestros na casa do Reino Novo, de Iria Souto (Universidad de Alcalá), quen analizou a relación entre espazos domésticos, roles de xénero e prácticas relixioso-máxicas no antigo Exipto. Amostrou evidencias arqueolóxicas, iconográficas e textuais que vinculan ás mulleres co culto aos antepasados no ámbito doméstico.
Pola súa banda, Irune Valderrábano (PollutedPast–Cretus) presentou A feminidade na relixión grega: por que as deusas non son mulleres, afondando nas diferenzas entre deusas e mulleres na relixión grega e evitando equivalencias simplistas, como sinalou a historiadora Nicole Loraux.
A clausura correu a cargo de Lidia González (Universidad de Oviedo) con Ritos e coidados: prácticas máxico-relixiosas e saúde feminina na antigüidade. A relatora explorou o uso das fontes máxico-relixiosas polas mulleres romanas, especialmente en prácticas de protección da súa saúde reprodutiva, a través de textos literarios, amuletos e tablillas de maldición.
