A urbe olívica volverá a situarse no epicentro do sector aeroespacial coa celebración da cuarta edición de New Space España, o congreso impulsado por Alén Space. O evento terá lugar os próximos 24 e 25 de setembro e reunirá na cidade a empresas, institucións, centros tecnolóxicos, universidades, startups e profesionais vinculados ao ecosistema espacial.
Baixo o lema “Autonomía estratéxica desde o espazo”, o congreso porá o foco no papel estratéxico que desempeña o sector espacial nun contexto internacional marcado pola necesidade de reforzar capacidades propias tanto en Europa como en España. A axenda abordará ámbitos clave como as comunicacións satelitais, a observación da Terra, a navegación, a sustentabilidade, a seguridade, a transferencia tecnolóxica e o desenvolvemento de novas oportunidades industriais.
“"New Space España é xa unha cita consolidada para o sector espacial en España e nesta cuarta edición queremos pór o foco en como o espazo contribúe á autonomía estratéxica, pero tamén á innovación, á competitividade e á mellora de servizos esenciais para a cidadanía."
A edición de 2026 chega ademais nun momento de forte crecemento para a economía espacial. Segundo datos de The Space Report 2025 Q2, a economía espacial global alcanzou en 2024 os 613.000 millóns de dólares, cun crecemento interanual do 7,8%. No caso español, o último Anuario do Sector Espacial de TEDAE sitúa a facturación da industria espacial en 1.293 millóns de euros durante 2024, un 16,5% máis que o ano anterior. O sector xera ademais 7.636 empregos directos e mantén un forte perfil exportador, con vendas exteriores que representan o 83% da facturación consolidada.
Entre as principais novidades desta edición destaca a creación dunha Convocatoria de Posters dirixida a universidades, centros tecnolóxicos, startups, empresas e investigadores para presentar proxectos e desenvolvementos vinculados ao ámbito espacial. Os traballos seleccionados exporanse durante o congreso nas áreas de networking para favorecer o contacto directo entre talento, industria e institucións. A pasada edición reuniu en Vigo a 120 empresas e preto de 300 profesionais.
