A Consellería de Sanidade acolleu hoxe a primeira reunión do ano do comité técnico interdepartamental do mosquito tigre. O obxectivo principal foi abordar a relevancia de formar e informar a determinados colectivos e á cidadanía en xeral sobre medidas que preveñan a proliferación deste tipo de mosquito.
Na xuntanza, que tivo lugar de forma presencial e por videoconferencia, participaron representantes municipais, das Consellerías de Medio Ambiente e Cambio Climático e do Medio Rural, das áreas sanitarias de Vigo e da Coruña e Cee, dos Departamentos Territoriais de Sanidade de Pontevedra e da Coruña, da Subdelegación do Goberno de Pontevedra, da Deputación de Pontevedra, da Dirección Territorial de Emerxencias de Pontevedra, así como persoal entomólogo da Universidade de Vigo.
A presenza do mosquito tigre está confirmada ata o momento en 13 concellos galegos: Moaña, Vigo, Cangas, Redondela, Vilaboa, O Porriño, Tui, Mos, Bueu, Ponteareas, Poio, Salvaterra de Miño e A Coruña.
Trasládase a importancia da colaboración cidadá no control deste insecto, xa que os seus lugares de cría atópanse maioritariamente en espazos privados. Recoméndase levar a cabo medidas de prevención como baleirar cada 3 ou 4 días recipientes que acumulen auga (macetas, bebedoiros de animais), cubrir balsas e piscinas, limpar desaugadoiros e evitar acumulacións de auga en charcos ou ocos de árbores.
O persoal entomólogo da Universidade de Vigo presentou o informe da Rede Galega de Vixilancia de Vectores do ano 2025.
En Galicia están presentes especies de mosquitos capaces de transmitir enfermidades como o virus do Nilo Occidental ou o dengue, chikungunya e zika. Aínda que na actualidade non transmiten estas enfermidades na comunidade, a súa vixilancia é fundamental para detectar cambios na situación epidemiolóxica.
