A Xunta, a través do Servizo Galego de Saúde, publicou a adxudicación á empresa IGLESIAS VEIGA ARQUITECTOS SLP dos servizos de redacción do proxecto básico e de execución e dirección de obra da reforma da área de reprodución asistida no Hospital Meixoeiro en Vigo. O importe da adxudicación ascende a 195.000 euros.
Esta actuación responde á necesidade de mellorar a cobertura sanitaria para a poboación de referencia da área sur de Galicia. A reforma do espazo no centro da rede sanitaria pública galega busca adaptar as instalacións para desenvolver o Plan galego de reprodución humana asistida.
O devandito plan inclúe melloras e novas prestacións que pretenden converter a carteira de servizos de Galicia na máis ampla a nivel estatal.
Actualmente, a unidade de reprodución humana asistida atópase no Centro Integral de Saúde Taboada Leal. A súa actividade implica catro especialidades médicas: xinecoloxía e obstetricia, anestesioloxía e reanimación, análises clínicas e uroloxía. O traslado ao Hospital Meixoeiro permitirá incorporar novas técnicas grazas a unha maior dispoñibilidade de salas.
A nova unidade situarase contigua ao bloque cirúrxico e á unidade de cirurxía maior ambulatoria para a zona de laboratorio e procedementos. As consultas, pola súa banda, estarán na segunda planta, ala 2, preto das consultas externas, que será o acceso para os pacientes.
