A campaña ‘Re-CORTIZA’, impulsada polo Concello de Redondela en colaboración coa asociación Lenda e a empresa Amorim Cork, pecha o seu primeiro ano cun balance moi positivo. Ata o momento, recolléronse preto de 100 quilos de tapóns de cortiza, o que equivale a máis de 22.000 unidades retiradas do lixo común, segundo informan desde a asociación Lenda, encargada da recollida e clasificación.
Este proxecto ten un dobre impacto. Por unha banda, supón unha ferramenta de integración e visibilidade para as persoas usuarias do Centro de Rehabilitación Psicosocial e Laboral da asociación de saúde mental Lenda. Estas persoas son as encargadas de recoller os tapóns nos establecementos hostaleiros adheridos, clasificalos e almacenalos, o que lles proporciona unha rutina laboral, fomenta o traballo en equipo e mellora a súa autonomía. Ademais, a empresa Amorim Cork remunerará economicamente a Lenda polos quilos de cortiza entregados, un retorno que se investirá en mellorar os programas sociais e terapéuticos da entidade.
No aspecto medioambiental, a iniciativa cumpre o obxectivo de evitar que este volume de residuos acabe nos vertedoiros, transformándoo nun recurso valioso. A implicación da hostalaría local permitiu canalizar a cortiza cara á economía circular. Grazas a Amorim Cork, este material natural terá unha segunda vida útil en sectores como a construción, para illamento e revestimento, ou na fabricación de compoñentes aeronáuticos, material deportivo e artesanía.
O concelleiro de Medio Ambiente, Alberto Álvarez, destacou o dobre impacto do proxecto: "Cando iniciamos ‘Re-CORTIZA’ fixemos un chamamento á hostalaría porque é onde máis se xera este residuo. Os datos constatan que a resposta foi moi positiva. O proxecto permite reducir residuos e, o máis importante, ofrece unha alternativa ocupacional e terapéutica de calidade no día a día ás persoas de Lenda". Tras este primeiro ano, o Concello de Redondela quere consolidar o proxecto e fai un chamamento a toda a cidadanía e aos establecementos hostaleiros que aínda non participan para que se sumen a esta rede sostible.
O proceso para os locais comerciais é gratuíto e sinxelo: só teñen que contactar co Concello de Redondela ou coa Asociación Lenda. O persoal do proxecto achegarase para deixarlles un colector específico e recoller os tapóns cando estea cheo. O Goberno local tamén anima á veciñanza a colaborar depositando as cortizas nos colectores dispoñibles en edificios municipais como a Casa do Concello, os Multiúsos da Xunqueira e Piñeiral do Crego, e as Prazas de Abastos de Redondela e Chapela.
