A Consellería de Educación, Ciencia, Universidades e FP publicou as listaxes definitivas de admitidos nestes centros, cuxo obxectivo é facilitar a residencia fóra do fogar a alumnos de estudos postobrigatorios non universitarios, principalmente Bacharelato e FP. A Xunta destina máis de 3,6 millóns de euros para cubrir este aloxamento.
En concreto, obtiveron praza para este curso 294 persoas na Coruña, 198 en Vigo e 194 en Ourense. Deste xeito, os centros residenciais docentes xestionados polo Goberno galego acadan unha ocupación do 85% no caso de Culleredo e do 100% nos de Ourense e Vigo, cifras moi similares ás do curso pasado.
Estes centros acollen preferentemente a estudantes matriculados en ensinanzas que non se imparten na súa localidade de residencia nin en concellos próximos accesibles. Isto garante que o alumnado galego poida cursar calquera formación, independentemente do lugar onde resida.
Os beneficiarios acceden ao servizo de forma gratuíta ou con condicións bonificadas, abonando unha cota ligada á renda familiar en función de tramos establecidos. A adxudicación realízase segundo criterios como a renda familiar, a condición de discapacidade ou desemprego, e o rendemento académico.
