O Concello de Redondela, a través das áreas de Participación Cidadá e Ensino, unifica as súas liñas de apoio ao tecido social, veciñal e educativo do municipio con tres convocatorias de axudas públicas para o ano 2026. A administración local inxecta un crédito global de 94.000 euros co obxectivo de sufragar os gastos correntes de locais parroquiais, financiar proxectos de dinamización veciñal e colaborar cos servizos de conciliación que xestionan as ANPAS.
A alcaldesa de Redondela, Digna Rivas, destacou o esforzo económico do Concello. "Os centros culturais e asociacións veciñais son o verdadeiro motor social das nosas parroquias, e as ANPAS exercen un papel educativo e de conciliación imprescindible no día a día das familias", manifestou a rexedora, engadindo que "dende as institucións públicas temos a obriga de apoialos con recursos directos para que poidan seguir desenvolvendo a súa actividade".
A subvención para o mantemento de Centros Culturais Parroquiais conta cun crédito de 40.000 euros, destinada a apoiar aos centros comunitarios sen ánimo de lucro no pago de gastos correntes como electricidade, auga, gasóleo, alugueres ou seguros do edificio. O importe máximo por entidade poderá acadar os 3.500 euros.
Outra liña, con 24.000 euros, está pensada para asociacións de veciños, centros sociais e federacións veciñais que realicen actividades sociais durante o ano 2026, baixo a convocatoria de Dinamización e Actividades Veciñais.
No caso das ANPAS, a subvención está dotada de 30.000 euros e vai destinada ao sostemento de comedores escolares e actividades extraescolares. Os beneficiarios directos son as Asociacións de Nais e Pais que xestionan os comedores escolares de centros de ensino público, e cofinanciará o desenvolvemento de ata un máximo de dúas actividades extraescolares.
As solicitudes para estas tres liñas deben xestionarse obrigatoriamente por vía electrónica a través da Sede Electrónica do Concello de Redondela. O prazo para as axudas a centros culturais e asociacións veciñais remata o 28 de setembro, mentres que para a subvención ás ANPAS a data límite é o 1 de outubro.
