A Sala Rosalía de Castro da Sede da Deputación en Vigo será o escenario o vindeiro mércores 16 de setembro, ás 19:30 horas, dun novo encontro do programa provincial Aquí faltan páxinas. Impulsado pola institución para rescatar historias de mulleres pouco visibilizadas, esta sesión centrarase na experiencia de Marina Ledo e Begoña Villar, as pioneiras que conformaron a primeira parella de policías locais femininas de Vigo.
Marina Ledo ingresou na Policía Local de Vigo en 1981, seguida por Begoña Villar dous anos despois. En 1985, ante a práctica exclusividade dos seus compañeiros homes na atención cidadá, fixeron historia ao patrullar xuntas, converténdose na primeira parella de mulleres policías locais da cidade. Nunha época de minoritaria presenza feminina nos corpos de seguridade, a súa incorporación supuxo un avance cara á igualdade real, superando as probas de acceso e afrontando prexuízos de xénero.
Esta iniciativa, que busca enxalzar figuras femininas relevantes da provincia, continuará con máis faladoiros tras abordar temas como as alfombristas, Juaniña do Porriño, Concepción Pérez Iglesias, as Nais contra a Droga, as mulleres de Gargamala, Marisol Soengas, Matilde Vázquez, Rita Fernández Queimadelos, Corona González, as mulleres do viño e, finalmente, a historia da cineasta Cruz Risco.
