A gala, que terá lugar o vindeiro 27 de xuño no Círculo Recreativo Cultural, coincide co 70 aniversario da entidade, fundada en 1956. Estes galardóns, considerados dos máis queridos e consolidados na localidade, distinguen anualmente a aqueles que contribúen a engrandecer o nome de O Porriño e a construír unha sociedade máis dinámica e comprometida.
Na edición de 2026, o Círculo destaca cinco traxectorias marcadas pola excelencia e o esforzo. Na categoría de 'Mención Especial', a científica Susana Teijeira, directora científica do Biobanco Galicia Sur, é recoñecida polo seu traballo na investigación de enfermidades como o cancro e as patoloxías neurodexenerativas, sendo un referente da ciencia galega contemporánea.
O premio 'Premio Círculo ao Recuerdo', a título póstumo, recae en Raúl Francés Valverde. Expresidente do CRC en dúas ocasións, deixou unha profunda pegada en O Porriño polo seu compromiso coa cultura, a memoria colectiva, o patrimonio e os valores democráticos.
Na área de Cultura, o director de produción cinematográfica Carlos Amoedo, coñecido por filmes como ‘La Cena’ e cunha forte vinculación ao CRC desde a súa mocidade, recibe o galardón. Na categoría de Música, Noemi Fernández é recoñecida polo seu talento e perseveranza para abrirse camiño no mundo da música profesional.
Finalmente, o gimnasta porriñés Hernán Sío obtén o 'Premio ao Deporte', sendo un exemplo de disciplina e superación que o sitúa entre os referentes deportivos a nivel nacional, levando o nome de O Porriño por onde vai.
