O Concello do Porriño encamiña a recta final das obras de mellora e reforma da pista deportiva do CEIP de Budiño. O alcalde do municipio, Alejandro Lorenzo, visitou hoxe o centro educativo para comprobar o avanzado estado dos traballos, que están a piques de concluír.
A actuación responde á necesidade de acondicionar e modernizar este equipamento deportivo. Entre as tarefas executadas atópase a realización dunha nova losa de formigón na pista de fútbol, a colocación de losetas e o posterior marcado e pintado das liñas regulamentarias das pistas deportivas.
Os traballos, cun orzamento de 36.320,67 euros (IVE incluído), dotan ao CEIP de Budiño duns espazos deportivos máis seguros, modernos e axeitados para a práctica da actividade física do alumnado.
Estas obras complétanse con outros traballos de mantemento levados a cabo no colexio, como melloras de fontanaría para aumentar a presión da auga nos baños do comedor e a instalación de novas luminarias nas aulas e no ximnasio. Tamén se incluíu a rehabilitación de baños, cunha inversión superior aos 10.000 euros.
Ademais, durante as vacacións de decembro procederase á reforma do parque infantil emprazado na fachada frontal deste colexio, que na actualidade conta con 135 alumnos.
