O Concello do Porriño acometerá nos próximos meses unha ambiciosa mellora da seguridade viaria no tramo entre San Campio e o Rego das Laxas, abarcando as parroquias de Pontellas e Atios. Esta intervención, cunha lonxitude aproximada de 1,8 quilómetros, busca renovar e acondicionar un camiño que presenta un estado de deterioro considerable e que serve de conexión vital entre as contornas de Centeáns e San Campio co Rego das Laxas e as áreas industriais da zona.
A importancia deste viario tamén reside no seu uso por parte de numerosos peregrinos, xa que forma parte do Camiño de Santiago. Ademais, proporciona acceso á área do Velódromo Municipal, que está previsto transformar nun moderno espazo de deporte urbano con skatepark e pump track.
O investimento total proxectado supera os 460.000 euros. Desta cantidade, preto de 310.000 euros provirán de fondos propios do Concello, mentres que os máis de 150.000 euros restantes serán achegados polo Plan Extraordinario Vía Depo da Deputación de Pontevedra.
O alcalde, Alejandro Lorenzo, subliñou que esta actuación responde ao compromiso do goberno municipal de continuar mellorando as infraestruturas parroquiais, especialmente aquelas que impactan directamente na vida cotiá da veciñanza. "Queremos actuar alí onde hai necesidades reais e seguir mellorando as comunicacións e os servizos nas parroquias", afirmou, engadindo que "son intervencións que poden parecer pequenas no conxunto do municipio, pero que teñen un efecto directo na calidade de vida dos veciños e veciñas".
Os traballos abranguerán tres tramos de estrada, renovando uns 15.800 metros cadrados de pavimento. Inclúen o fresado e regularización do firme, a aplicación dunha nova capa de rodadura e a ampliación da calzada onde sexa factible. Tamén se abordará a mellora da drenaxe mediante a limpeza de cunetas, sumidoiros e arquetas, xunto coa renovación da sinalización horizontal e vertical.
Na zona próxima á Rede Natura 2000 das Gándaras de Budiño, instalaranse preto de 650 metros de barreira protectora. Adaptaranse tapas de rexistro e arquetas, e plantaranse carballos nas áreas afectadas pola ampliación do firme. O concelleiro de Vías e Obras, Ramón Porto, destacou que a intervención é integral, buscando mellorar firme, drenaxe, sinalización e protección para lograr un viario "máis seguro, cómodo e funcional".
O prazo de execución previsto é de tres meses. O goberno municipal enmarca esta obra na súa planificación de investimentos para a mellora progresiva da rede viaria municipal, asegurando que "imos seguir destinando recursos ás parroquias e aproveitando todas as vías de financiamento ao noso alcance para sacar adiante actuacións necesarias e útiles para a veciñanza".
