O Concello do Porriño sacou a licitación as obras de “Mellora do contorno do Local Social do Casal, Budiño”, cun investimento total de 250.210,11 € con IVE, subvencionado polo Plan+Provincia 2026-2027 da Deputación de Pontevedra. A intervención transformará unha superficie de 3.460 metros cadrados para priorizar o uso peonil, crear un novo parque infantil, ordenar o tráfico e potenciar as zonas verdes.
O proxecto, cun prazo de execución de seis meses, busca mellorar a seguridade viaria e gañar espazo para os peóns. O tráfico rodado concentrarase de forma ordenada a través do camiño de Chan do Casal, na zona norte da parcela, eliminando o paso de vehículos diante do centro social e das zonas de xogos. O vial pavimentarase con formigón coloreado e contará con medidas de calmado de tráfico. A seguridade viaria mellorarase no entronque coa estrada provincial EP-2405 co uso de lastras de granito silvestre.
Prevese a adecuación dunha área de xogos infantís de 150 m² e a ampliación do espazo peonil en 281 m², integrando o arborado existente con alcorques e bancos de pedra. Tamén se renovará a área deportiva, substituíndo o pavimento da pista e dotándoa dun perímetro axardinado con árbores. Substituiranse superficies duras por novas zonas axardinadas con especies autóctonas.
O proxecto tamén contempla a posta en valor de elementos patrimoniais como o contorno da igrexa e o cruceiro, creando un perímetro axardinado específico arredor deste último. Mellorarase o palco da música e executarase o retranqueo do muro de peche para ampliar a beirarrúa.
O alcalde do Porriño destacou que esta actuación responde a unha demanda histórica da veciñanza, transformando un espazo desestruturado nun punto neurálxico de convivencia accesible, seguro, sustentable e integrador.
