O Concello da Coruña está a elaborar un plan de difusión para as rutas patrimoniais polo ámbito da Cidade Vella. Este servizo, actualmente en proceso de contratación, incluirá o deseño de materiais de dinamización e comunicación para activar os itinerarios culturais e patrimoniais.
A iniciativa está enmarcada nun plan financiado mediante unha subvención do Ministerio de Industria e Turismo, destinada a proxectos sostibles de mantemento e rehabilitación de Patrimonio Turístico, cun importe total de 2.088.000 euros.
“"O centro histórico da cidade supón un dos seus grandes valores e atractivos. É unha viaxe pola historia e pola identidade da Coruña. Por iso estamos a reforzar as accións para dar a coñecer dentro e fora todas as marabillas arquitectónicas, artísticas e culturais destas rúas."
As accións de promoción e comunicación buscan xerar notoriedade e afinidade cos usuarios, ademais de mellorar e diversificar a oferta turístico-patrimonial na zona, garantindo experiencias de calidade.
Tamén se subliña a importancia de itinerarios de temática específica, como os centrados en arquitectura, literatura, patrimonio biocultural, legado histórico-militar, figuras femininas ou o legado hebreo na Cidade Vella, co obxectivo de sensibilizar sobre os roteiros turísticos alternativos.
