O programa de actividades de verán Redondela Actívate, organizado pola Concelleira de Servizos Sociais e Maiores do Concello de Redondela, continúa a rexistrar cifras de participación destacadas. A iniciativa combina exercicio físico, estimulación cognitiva e socialización, con quendas de mañá e tarde para facilitar a asistencia de toda a veciñanza de máis idade.
As clases de “Baile e Benestar” nas praias están a ter un éxito especial. Estas sesións vespertinas desenvólvense de luns a xoves a partir das 18:00 horas. Na praia de Arealonga (Chapela) son os luns e mércores, mentres que os martes e xoves as clases trasládanse á praia da Punta (Cesantes). Ambas as praias convértense en pistas de baile ao aire libre, congregando a ducias de persoas que combinan diversión e exercicio físico nunha contorna natural.
A alcaldesa, Digna Rivas, destaca a “gran participación” de público de todas as idades nestas actividades “divertidas, saudables e gratuítas”. As coreografías, deseñadas por unha monitora especializada, buscan mellorar a coordinación, a axilidade e a resistencia cardiovascular.
Ademais das sesións de tarde, pola mañá celébranse clases de “Baile e Benestar” a partir das 09:30 horas os luns na Senda Verde de Chapela e os martes na Alameda de Redondela. As clases de “Activa o teu Equilibrio”, que combinan ximnasia e Tai Chi, traballan o control corporal os mércores na Senda Verde de Chapela e os xoves na Alameda Castelao.
Outras novidades deste verán inclúen o “Faladoiro en Cadeneta: Libros, agullas e vida”, un punto de encontro socio-cultural que se celebra os venres na Biblioteca de Redondela de 11:30 a 12:30 horas. Tamén se ofertan os “Roteiros Didácticos”, cunha próxima saída o venres 17 de xullo ás 09:30 horas desde a Alameda Rosalía de Chapela, e outra o venres 24 desde a Praza do Concello.
A concelleira de Servizos Sociais e Maiores, Iria Vilaboa, amosa a súa satisfacción pola acollida do programa, sinalando que “os maiores, pero tamén público máis novo, mantéñense activos nun ambiente fresco, divertido e natural”, o que repercute positivamente no seu benestar físico e emocional durante o verán.
