A aplicación, baseada en datos de OpenStreetMap, facilita a creación de modelos 3D detallados de cidades. O proceso consiste en seleccionar unha área específica nun mapa interactivo, tras o cal a ferramenta extrae automaticamente información xeométrica, alturas de edificios e trazado de rúas. Estes datos utilízanse para xerar unha contorna tridimensional directamente no navegador, que pode exportarse en formato GLB, idóneo para visores e aplicacións 3D.

Esta solución supón unha alternativa accesible e gratuíta aos costosos softwares comerciais para a obtención de maquetas urbanas en 3D. A ferramenta non require inicio de sesión, conta cunha licenza de código aberto completa, permite a modificación e mellora dos modelos xerados e a súa exportación en formatos listos para o uso inmediato.

A ferramenta permite analizar en detalle os edificios e o trazado urbano de distintas cidades galegas. No caso de Vigo, poden identificarse tanto edificios residenciais de ata 14 plantas como espazos emblemáticos da cidade. Entre eles destacan a estación de Vigo-Urzáiz, a nave da empresa de produtos do mar Pereira na avenida de Beiramar, o histórico edificio Simeón, a sede social do Real Club Celta —de seis pisos— e o Museo de Arte Contemporánea de Vigo (MARCO), que aparece representado con tres alturas.

En A Coruña, o skyline tridimensional amosa con claridade varios edificios recoñecibles, como o Edificio O Mar e o Lagoa, ambos con nove plantas. Tamén sobresae a característica forma circular do Pazo dos Deportes de Riazor. No parque próximo pode distinguirse ademais a Casa das Ciencias, representada con catro pisos. O resultado ofrece a imaxe dunha cidade con gran concentración de edificios, mais tamén con numerosas zonas abertas e espazos verdes.

A Cidade Vella de Santiago de Compostela tamén pode visualizarse en tres dimensións. No modelo aparecen elementos como o Pazo de Xelmírez, a Marquesiña de Xoán XXIII ou o Museo das Peregrinacións de Santiago de Compostela. Porén, a Catedral non chega a representarse, o que evidencia que esta tecnoloxía aínda se atopa nunha fase inicial e non incorpora a totalidade dos edificios e detalles urbanos.

Algo semellante sucede en vilas máis pequenas, como Sarria. Neste caso, os planos presentan un nivel de detalle máis limitado e unha renderización máis sinxela. Aínda así, poden identificarse espazos destacados como a Igrexa de San Salvador, a Torre do Batallón, o edificio do concello, algúns supermercados e a estación de autobuses. O resto do mapa corresponde principalmente a vivendas e edificios residenciais.