A Xunta mellora as súas instalacións en Baiona cun investimento de 62.000 euros. As actuacións céntranse na escola infantil e no centro de día, pertencentes á rede pública autonómica, e enmárcanse no programa de melloras que se desenvolve ao longo do ano nos equipamentos da rede pública.
Na escola infantil, xa se substituíron recentemente as fiestras exteriores das aulas, dos comedores, da cociña, dos almacéns e do despacho de dirección. Esta intervención tivo un custo de 21.500 euros.
No centro de día, o Consorcio Galego de Servizos de Igualdade e Benestar acometerá nos vindeiros meses obras cun investimento de 40.400 euros. Os traballos incluirán a mellora da accesibilidade coa substitución do pavimento exterior, permitindo unha saída cuberta para os vehículos adaptados.
Ademais, repararanse elementos metálicos na terraza superior para evitar humidades e filtracións de auga, así como humidades interiores e pintaranse as áreas afectadas. Tamén se colocarán toldos na zona exterior axardinada.
Nos vindeiros meses o Consorcio realizará obras no centro de día dentro do plan de melloras de centros de maiores financiados con fondos europeos do Mecanismo de Recuperación e Resiliencia (MRR).
