O concello de O Porriño acolle o vindeiro sábado 22 de agosto, ás 20:30 horas, na Praza Arquitecto Antonio Palacios, o espectáculo de ilusionismo titulado ‘2 Ilusionistas cunhas maxias subversivas’. Esta proposta está protagonizada pola Maga Fani e Martín Camiña, e combina maxia, humor e unha perspectiva crítica social.
O show presenta un encontro entre dous ilusionistas que achegan ao público números de maxia pouco convencionais, arroupados por humor, sorpresas e diversión. Trátase dunha proposta escénica, asimétrica e irreverente, deseñada para romper cos formatos tradicionais da maxia e ofrecer unha experiencia distinta.
“"Seguimos enchendo as rúas do Porriño de cultura, de actividade e de propostas diferentes que permiten á veciñanza desfrutar do verán na rúa. Espectáculos como este son fundamentais para garantir unha axenda cultural variada, dinámica e para todos os públicos."
A Maga Fani, cunha formación en Bioloxía, ballet clásico, danza-jazz e expresión corporal, desenvolve o seu traballo arredor da maxia, o circo e a danza. Incorpora nos seus espectáculos temas como a igualdade, a loita contra os estereotipos, a defensa da lingua e da cultura, e a promoción dun humor saudable, resultando nunha proposta artística coidada e comprometida.
Pola súa banda, Martín Camiña é un ilusionista con recoñecida traxectoria e varios galardóns. Destacan o terceiro premio nacional de maxia en Donostia na modalidade de cartomaxia, así como terceiros premios en congresos internacionais en Almussafes e no Algarve. Ademais, realizou xiras por Xapón nos anos 2011 e 2012.
O Concello do Porriño anima a veciñanza a asistir a este evento na Praza Arquitecto Antonio Palacios, destacando que é unha proposta pensada para sorprender, divertir e reivindicar a maxia como ferramenta de expresión artística. O espectáculo conta coa colaboración da Xunta de Galicia, da Axencia Galega das Industrias Culturais (AGADIC) e de Cultura no Camiño.
