A formación galega, que ofrecerá a súa actuación a partir das 21:30 horas, enmárcase na súa xira de conmemoración e conta coa colaboración da Deputación de Pontevedra a través do programa ‘+ Música’. Luar na Lubre recibiu o ano pasado a Medalla Castelao da Xunta de Galicia.
Este concerto reafirma ao Chandefolk como unha cita imprescindible para os amantes do xénero folk galego, sumándose a artistas de renome que xa pasaron polo festival como Milladoiro, Budiño, Susana Seivane ou Xabier Díaz e Adufeiras do Salitre. As actuacións comezarán ás 21:00 horas coas ‘Pandereteiras do Sobreiro’, recoñecida formación miñorana.
O alcalde de Nigrán, Juan González, destacou o orgullo de acoller na carballeira de Chandebrito a unha banda tan internacional como Luar na Lubre, nacida na Coruña en 1986. A banda leva percorrido o mundo, actuando en máis de 35 países e ofrecendo máis de 2.000 concertos.
A traxectoria de Luar na Lubre inclúe unha colaboración co músico Mike Oldfield en 1992, que resultou nunha versión do seu tema ‘O son do ar’ en 1996. Esta circunstancia impulsou a fama do grupo, que participou na xira ‘Then & Now’ en 1999.
Ao longo dos seus 37 anos de carreira, Luar na Lubre ten vendido máis de 350.000 exemplares, obtido dous Discos de Ouro e nove Premios da Música, ademais doutros recoñecementos. Participaron en festivais xunto a artistas internacionais como The Waterboys, The Corrs ou Bob Geldof, e nacionais como Víctor Manuel ou Luz Casal.
O grupo, cuxo nome significa 'luar no bosque sacro dos celtas', fundouse na Coruña co obxectivo de interpretar e divulgar a música e cultura galega, baseándose en músicas de raíz con perspectiva de modernidade. A formación actual complétana Bieito Romero (gaitas, acordeón, zanfoña), Cristina López (voz), Nuria Naya (violín), Patxi Bermúdez (bodhran, tambor), Pedro Valero (guitarra acústica), Xavier Ferreiro (percusión latina, efectos), Xan Cerqueiro (frautas) e Brais Maceiras (acordeón).
