A institución académica viguesa consolídase na edición deste ano entre as mellores universidades do mundo segundo o ránking, que emprega cinco indicadores básicos para a avaliación: docencia, contorna de investigación, calidade da investigación, perspectiva internacional e industria. Tras varias edicións no tramo 1001-1200, a UVigo subiu hai tres anos un chanzo, manténdose desde entón na franxa 801-1000 e mellorando progresivamente as súas puntuacións.
A puntuación en calidade da investigación (Research Quality) mellora ata os 62.3 puntos sobre 100, fronte aos 60.9 da edición anterior. No apartado de docencia (Teaching), a avaliación da reputación, a ratio de docentes/estudantes ou a porcentaxe de doutores confirma un novo incremento, pasando de 25.2 a 27.0.
En relación coa contorna de investigación e transferencia (Research Environment), a UVigo acada unha avaliación de 21.6 puntos, fronte aos 19.8 do ano pasado. En internacionalización (International Outlook), o ránking puntúa á Universidade de Vigo cun 50.5 (49.8 en 2026), tendo en conta aspectos como a capacidade para atraer estudantado e persoal estranxeiro e para desenvolver proxectos de investigación e cooperación internacionais.
No que respecta ao indicador relativo á industria (Industry), que avalía a capacidade de transferencia de resultados de I+D e patentes, a UVigo suma 59.7 puntos (60.1 en 2026).
A nivel estatal, as universidades catalás copan os postos de cabeza, coa Universitat de Barcelona no posto 143, seguida pola UAB no 175 e a Pompeu Fabra no 205. A Universidad de Navarra sitúase no cuarto posto con 275 puntos. No caso das universidades galegas, a USC comparte coa UVigo o tramo 801-1000, mentres que a UDC aparece no 1201-1400.
