A Facultade de Filoloxía e Tradución (FFT) da Universidade de Vigo celebra a súa terceira edición da Semana das Linguas, as literaturas e a traución, que se desenvolverá en diferentes espazos do centro de Vigo entre o luns 21 e o sábado 26 de setembro. O obxectivo é achegar á cidadanía a actividade investigadora, creativa e de divulgación da facultade, coincidindo coas celebracións dos días internacionais das Linguas de Sinais e da Tradución, e do Día Europeo das Linguas.
A iniciativa, organizada pola FFT e o Instituto de Investigación Lingua, busca "celebrar a diversidade lingüística e cultural e favorecer o encontro e o diálogo entre linguas e culturas", segundo explica Carla Figueiras Catoira, docente e investigadora. Ademais, preténdese "difundir as humanidades, baixando simbolicamente da Facultade de Filoloxía e Tradución á rúa para achegar á cidadanía unha parte do traballo que se desenvolve no centro".
O programa inclúe cursos intensivos de éuscaro e lingua e cultura lituana, impartidos por Haizea Saez De Eguilaz (Instituto Etxepare) e Vigilija Žiūraitė (Universidade Vytautas Magnus), respectivamente. Estes cursos terán lugar na sede da Deputación de Pontevedra en Vigo dende o luns 21 ata o xoves 24.
O mércores 23 de setembro, tamén na Deputación, celebrarase o faladoiro feminista Letras en feminino (17:00h), coa participación de Ánxela Lema París, Elisabeth Sánchez Tocino, Leyre Martín Aizpurue e Ane Irizar Melero, abordando a literatura e a tradución con representación do galego, éuscaro e literaturas africanas e medievais.
O xoves 24, o museo Marco acollerá a xornada Investiga, dirixida a estudantes para presentar as súas investigacións. Alberto Álvarez Lugrís, docente e investigador, sinala que se farán presentacións didácticas e doadas de comprender, complementadas cunha conferencia de Anna Doquin (Universidade Complutense) sobre deseño de investigacións en Lingüística aplicada.
Esa mesma tarde (18:30h), na Casa Galega da Cultural, terá lugar a mesa redonda Da idea ao libro: as mans invisibles. Blanca Miranda Rodas, investigadora, explica que se abordarán os eixes da cadea do libro (autoría, tradución, edición) coa participación das escritoras Ana Varela e Paula Merlán, o escritor Manuel Esteban, a tradutora Tamara Andrés e representantes das editoriais Catro Ventos, Galaxia e Malafera.
O venres 25, na Escola Oficial de Idiomas de Vigo, desenvolverase a III Xornada de formación de profesorado de idiomas, co obxectivo de "transferir a investigación que facemos na universidade á sociedade", segundo María Méndez Santos, docente e investigadora. Formaranse gratuitamente docentes nas últimas tendencias didácticas e resultados de investigación en lingüística aplicada.
O sábado 26, a praza do Berbés acollerá o III Festival das linguas e as culturas (11:00-19:00h), pensado para dar visibilidade á riqueza e diversidade das comunidades en Vigo. Carla Figueiras Catoira destaca a importancia de reivindicar o papel das humanidades como "un espazo de unión e diálogo, pero tamén de liberdade, resistencia, pacifismo e pluralidade".
O festival dividirase en zonas temáticas: Begoña Caamaño (charlas sobre accesibilidade lingüística, lingua mexicana, fútbol gaélico, xantar popular), Luisa Villalta (intervencións de Belas Artes, pousadoiro de roupa tradicional, mariachis, obradoiro de djembé), Palilleiras (encadernación, catrinas, taichi) e Cantareiras (danza afro, K-pop, baile irlandés).
Como parte do festival, a Embaixada de Xapón en España entregará o XIX Premio Internacional de Manga á ilustradora e guionista arousá Emma Ríos pola súa obra Anzuelo. A agregada cultural da Embaixada, Yuka Hayashi, será a encargada de entregar a medalla de bronce. Ríos investiu cinco anos na elaboración desta obra que narra a supervivencia de tres nenos tras un tsunami.
Ademais da entrega do premio, Emma Ríos impartirá a charla Deseñando Anzuelo: reflexións sobre o proceso creativo (16:45h na Zona Begoña Camaño), organizada pola Embaixada de Xapón.
