A iniciativa, que busca achegar a ciencia á cidadanía e espertar vocacións científicas, transformará rúas, prazas e museos en laboratorios ao aire libre. Participarán máis de 500 investigadoras e investigadores de toda a comunidade autónoma.
A vicerreitora de Cultura, Lingua e Patrimonio da USC, Ana Cabana, destacou que a G-Night é unha oportunidade para "sacar a investigación dos laboratorios [...] para levala ao encontro da sociedade". A programación inclúe experimentos, demostracións, expo-feiras científicas, obradoiros e xornadas de portas abertas adaptadas a todas as idades.
Os escenarios da G-Night incluirán espazos emblemáticos como o claustro do Colexio de Fonseca en Santiago de Compostela, a dársena da Mariña na Coruña, o mercado municipal e a praza de abastos de Lugo, ou o edificio Redeiras en Vigo, entre outros.
A G-Night forma parte da European Researchers’ Night, un evento da Unión Europea que se celebra simultaneamente en máis de 460 cidades. A Universidade de Vigo coordina a edición deste ano, coa participación das universidades da Coruña e Santiago de Compostela, institutos do CSIC, centros oceanográficos e outros organismos de investigación galegos.
O evento conta co apoio da Xunta de Galicia, a través da GAIN (Axencia Galega de Innovación), e a colaboración da Real Sociedad Española de Química, ademais de achegas a nivel local.
