A industria moderna avanza cara a modelos máis conectados, flexibles, eficientes e sostibles. Tecnoloxías como a intelixencia artificial aplicada, o machine learning, o IoT ou o cloud continuum son os motores desta transformación. Dende Gradiant, estas capacidades trasládanse a proxectos e solucións deseñadas para axudar ás empresas industriais a dixitalizar os seus procesos, mellorar a súa competitividade e avanzar na adopción dos modelos de Industria 4.0 e 5.0.
Marielena Márquez, enxeñeira de Telecomunicacións pola Universidade de Vigo e MBA pola Galicia Business School, lidera esta área como responsable de Industria en Gradiant. Dende o seu posto, impulsa proxectos de innovación e transferencia tecnolóxica que achegan as tecnoloxías avanzadas ás necesidades reais do sector industrial.
Márquez reflexiona sobre a súa evolución profesional, destacando a ilusión e as ganas de aprender que a caracterizan dende os seus inicios. "Aínda que estou a dar primeiros pasos nun novo posto, moi distinto ao que tiña hai 3 anos, fagoo coa mesma ilusión e ganas de aprender e crecer como profesional", afirma. A experiencia adquirida nestes anos permitiulle afrontar novos retos e desenvolver capacidades técnicas e interpersoais, sentíndose máis segura para enfrontarse ao futuro. O apoio do equipo de Gradiant foi fundamental neste crecemento.
O seu perfil evolucionou dunha faceta puramente técnica cara a un rol que integra estratexia, negocio e relación coas empresas. "Aínda que este rol permíteme estar en contacto coa tecnoloxía, boto de menos poder dedicar tempo a resolver directamente problemas técnicos", admite. O seu maior reto é aprender a xestionar a responsabilidade sen implicarse en exceso nos detalles técnicos, focalizando o tempo nas tarefas que achegan valor á liña de Industria.
Como responsable, Márquez busca construír un equipo baseado na confianza mutua, a transparencia e a comunicación aberta. "Quero que as persoas do meu equipo sintan que poden dicirme as cousas como son", sinala. Tamén fai fincapé en coñecer as fortalezas e motivacións de cada membro para potenciar o seu desenvolvemento individual e o conxunto do equipo, aprendendo a delegar e a dar máis espazo e independencia.
A formación recibida no MBA foi clave para adquirir unha visión máis ampla en áreas como marketing, finanzas e xestión de persoas, complementando a súa base técnica. "A parte que máis valor apliquei no día a día foi todo o relacionado coa xestión e liderado de persoas", indica. A experiencia práctica, a resolución de conflitos e a xestión de clientes tamén achegaron ferramentas valiosas.
Gradiant traballa para que a transferencia tecnolóxica teña un impacto real nas empresas. "Non se trata de innovar por innovar, senón de atopar a solución que realmente aporte valor", explica Márquez. Involúcrase no negocio e procesos das empresas, combinando o seu coñecemento tecnolóxico co experto do cliente para deseñar solucións a medida.
Os factores clave para o éxito da transferencia tecnolóxica son os datos e as persoas. "A principal barreira adoita ser dispoñer de datos accesibles en cantidade e calidade suficientes", sinala. Involucrar aos usuarios finais dende o principio é crucial para facilitar a aceptación e asegurar que a solución achega valor.
O maior valor de Gradiant reside na súa capacidade para combinar diversas capacidades tecnolóxicas (IoT, cloud-edge, IA, ciberseguridade) e abordar os problemas de forma global. "Unha empresa non adoita necesitar 'IA' ou 'edge' de xeito illado, senón resolver unha necesidade concreta", afirma Márquez. A visión transversal e o desenvolvemento de solucións a medida permiten propoñer a tecnoloxía que mellor se axusta a cada empresa.
A longo prazo, Márquez desexa que Gradiant se consolide como un aliado tecnolóxico de referencia para o sector industrial en Galicia, España e Europa. "Queremos que a tecnoloxía se traduza en maior competitividade, novas oportunidades e crecemento económico para a nosa industria", conclúe.
