A organización de Galicia Fest ten todo preparado para recibir aos asistentes cunha fin de semana chea de música e enerxía. Para garantir que a experiencia sexa o máis agradable posible, recompilouse toda a información esencial sobre o festival.
Os asistentes xa poden consultar o mapa do recinto para familiarizarse coa localización dos escenarios, as zonas de restauración e outros espazos de interese, asegurando así non perder ningunha das propostas programadas.
Para desprazarse ao festival, existen diversas opcións. En tren, desde Madrid pódese chegar a Vigo Urzaiz en AVE ou Alvia, mentres que desde Porto a conexión faise co Tren Celta ata Vigo Guixar. Para viaxes dentro de Galicia, servizos de Media Distancia conectan cidades como Pontevedra, Santiago de Compostela e A Coruña coas estacións viguesas. Tamén hai opcións de transporte marítimo desde a península do Morrazo, con saídas desde Cangas do Morrazo e Moaña. Quen opte polo coche, deberá planificar con antelación o uso dos aparcadoiros dispoñibles.
O proceso para acceder ao festival require tres pasos: validación da entrada, recollida da pulseira e posterior recarga. O punto de recollida estará no Centro Comercial Vialia Estación de Vigo o xoves, 25 de xuño, de 18:00 a 21:00 h. Os días venres, 26 de xuño, e sábado, 27 de xuño, o punto desprazarase á Escultura de O Nadador, en Vigo, operando de 13:00 a 22:00 h.
Ademais, habilitarase un espazo seguro coa presenza dun punto de atención na Oficina do Festival. Este servizo estará dispoñible para quen necesite comunicar ou denunciar calquera situación de acoso, agresión sexista ou comportamento inadecuado. O persoal do festival tamén ofrecerá axuda directa, co obxectivo de garantir un ambiente respectuoso para todas as persoas.
