A iniciativa, posta en marcha pola Xunta, ten como obxectivo principal promocionar e fomentar o consumo dos produtos pesqueiros e da acuicultura galega en toda a comunidade. A campaña desenvolverase ao longo do período 2026-2028 mediante rutas gastronómicas itinerantes.
As catro unidades móbiles ofrecerán degustacións de elaboracións a base de peixes e mariscos galegos, como navallas á prancha, croquetas de choco ou empanada de bonito. Participarán en diversos eventos como feiras, festas populares, encontros deportivos ou actividades educativas, achegando estes produtos tanto a localidades costeiras como do interior.
A xornada de presentación comezou en Vigo e continuou en Ribadavia (Ourense), Lugo, A Coruña e Ferrol, onde a conselleira do Mar destacou a importancia de poñer en valor o traballo dos profesionais do sector marítimo-pesqueiro e as propiedades nutricionais destes manxares.
A campaña GALICIA SABE AMAR, cofinanciada con fondos europeos a través do Fondo Europeo Marítimo, de Pesca e de Acuicultura (FEMPA), busca achegar a cidadanía a variedade e as posibilidades culinarias dos produtos do mar galego.
