Menos de 700 pacientes dos preto de 8.000 que solicitaron o cambio de atención especializada do Hospital Povisa ao Hospital Público Álvaro Cunqueiro tiñan asistencia pendente no momento da transición, segundo informou o director xeral de Integración e Innovación Asistencial do Servizo Galego de Saúde, Alfredo Silva. O 90 % deses casos son procesos de baixa complexidade.
Silva xustificou a capacidade do hospital público no reforzo de recursos humanos, coa contratación de 40 profesionais de diversas categorías e especialidades médicas, incluíndo neurocirurxiáns, cardiólogos, fisioterapeutas, logopedas, neurólogos, oncólogos, hematólogos e farmacéuticos hospitalarios, ademais de persoal de enfermaría, técnicos e celadores.
Como mostra da súa capacidade, o Complexo Hospitalario Universitario de Vigo xa absorbeu nos últimos cinco anos 12.611 pacientes procedentes do Hospital Povisa. Isto implicou preto de 66.000 consultas médicas, máis de 30.000 doutro tipo, 17.622 probas diagnósticas e terapéuticas e 2.873 entradas na lista de espera cirúrxica.
Ademais, prevese licitar proximamente as obras de ampliación das urxencias do Hospital Público Álvaro Cunqueiro. Alfredo Silva tamén lembrou que o tempo medio de espera no Hospital Povisa en decembro de 2025 foi 5,5 días inferior ao do mesmo período de 2024.
Deste xeito, o Servizo Galego de Saúde asegura o mantemento da calidade asistencial para toda a poboación da área sanitaria de Vigo, independentemente do centro hospitalario de referencia que escollan.
