O máximo órgano de representación e control da Universidade de Vigo, o Claustro, reunirá o vindeiro luns día 13 a súa sesión constituínte. Nesta xuntanza elixirase a composición do Consello de Goberno, así como a de varias comisións importantes.
O Claustro desta nova lexislatura, baixo o liderado da reitora Carmen García Mateo, estará composto por un total de 245 membros. Deles, 220 foron elixidos nas eleccións celebradas o pasado 6 de maio, mentres que os 25 restantes son membros natos. Entre estes últimos atópanse a propia reitora, a secretaria xeral, a xerenta, e os decanos e decanas, xunto cos directores e directoras das facultades e escolas universitarias. Segundo os resultados electorais de maio, permanecen vacantes 31 prazas: 27 no sector PDI-A (profesorado doutor con vinculación permanente) e 4 no sector de estudantes.
A sesión, de carácter extraordinario, comezará coa constitución da Mesa de Idade. Esta mesa estará integrada pola reitora, a secretaria xeral e dous representantes por cada sector do Claustro, que serán os membros de maior e menor idade de cada sector. A súa función será moderar a sesión na que se procederá á elección da Mesa do Claustro.
Unha vez conformada a Mesa do Claustro, a orde do día proseguirá coa elección dos membros do Consello de Goberno. Tamén se elixiran membros doutros órganos relevantes, como a Comisión Electoral, a Comisión para o estudo da adaptación estatutaria á LOSU, a Comisión de Reclamacións, os membros dos Consellos de Campus de Ourense e Pontevedra, a Comisión asesora da Valedoría Universitaria e a Presidencia do Consello de Estudantes da Universidade de Vigo (CEUVI).
Do total de 220 membros electos, 101 representan ao sector PDI-A; 22 ao resto do persoal docente e investigador (PDI-B); 59 son estudantes; e 38 representan ao persoal técnico de administración e servizos (PTXAS). No sector PDI-A, 73 foron elixidos por votación directa e 28 en centros onde non foi necesario celebrar eleccións. No sector de estudantes, 42 foron elixidos nas urnas, mentres que para 17 postos adicionais non se requiriu votación. Tres centros quedaron sen representación estudantil ao non presentarse candidaturas.
Os sectores PDI-B e PTXAS cubrirán o 100% das súas prazas no Claustro. No sector do profesorado con vinculación non permanente presentáronse 60 candidaturas para 22 prazas, e no PTXAS, 90 candidaturas para 38 prazas.
