Co inicio do novo curso, os laboratorios do Centro de Investigación en Nanomateriais e Biomedicina (CINBIO) da Universidade de Vigo volverán abrir as súas portas á cidadanía. O centro, integrado na Rede Cigus, preparou unha nova edición do seu ciclo de divulgación científica '[Ciencia con C de CINBIO](https://cinbio.es/cienciaconcdecinbio/)', cofinanciado pola Xunta de Galicia e Fondos Europeos. As citas terán lugar o vindeiro martes 15 na rúa do Príncipe e o venres 18 nas propias instalacións do centro, ambas en horario de tarde.
O director do CINBIO, Miguel Correa, subliña o compromiso do centro coa divulgación e o fomento das vocacións científicas. "Abrimos as nosas portas e volvemos saír á rúa para encher de ciencia o centro da cidade co fin de amosar como se constrúe o coñecemento desde os nosos laboratorios e visibilizar a investigación de vangarda feita en Galicia", afirmou.
O martes 15, desde as 16.30 ata as 20.30 horas, instalarase unha carpa na rúa do Príncipe. Alí, o público poderá descubrir a actividade investigadora do CINBIO a través de demostracións prácticas. Participarán grupos como o de Biomasa e Desenvolvemento Sostible (EQ-2) do campus de Ourense, que presentará o mundo dos biomateriais e as súas aplicacións. Tamén haberá un xogo interactivo sobre o ADN do grupo CellCOM (Comunicación celular en cancro e en enfermidades asociadas á idade), xincanas científicas e obradoiros de creación de materiais biodegradables.
O venres 18, a partir das 16.00 horas, o centro de investigación acollerá unha xornada de portas abertas. Preto de 80 persoas, tras inscribirse previamente a través dun formulario na web do centro, poderán vivir unha experiencia única. Durante unha visita guiada duns tres horas, os asistentes coñecerán o persoal investigador, os proxectos en desenvolvemento e participarán en actividades experimentais deseñadas para achegar a ciencia dun xeito próximo e divertido.
As actividades inclúen o taller 'O ADN nas túas mans', demostracións sobre química orgánica, experiencias sobre a luz e nanomateriais, nanotecnoloxía con nanopartículas e sistemas de liberación de fármacos, cociña molecular, e actividades sobre comunicación neuronal e propiedades plasmónicas de nanopartículas.
Estas propostas están organizadas por integrantes de diferentes grupos de investigación do CINBIO, como Filoxenómica, CellCOM, Orchid, Biomimat, TeamNanoTech (TNT), Neurocircuits, FunNanoBio e Chilab.
