A Deputación de Pontevedra organiza este mércores, 12 de agosto, unha xornada especial no Castelo de Soutomaior para observar o eclipse solar. A actividade, enmarcada no programa 'Cata con Historia', esgotou as 15 prazas dispoñibles en tan só trinta minutos tras abrir as inscricións o pasado venres 31 de xullo.
Baixo o título 'A eclipse no viñedo', a sesión combinará a observación do fenómeno astronómico, cuxo momento álxido será arredor das 20:30 horas, coa cata de viños da Denominación de Orixe Rías Baixas. O sommelier Jacobo Rivas será o encargado de seleccionar os viños e guiar a degustación, que avanzará "de luz a sombra", desde viños máis novos a outros de maior crianza. Os asistentes contarán con material homologado para seguir a eclipse e haberá unha breve explicación do fenómeno. A cata tamén incluirá maridaxe con produto local de tempada.
O programa 'Cata con Historia' xa acolleu outras citas este ano, como 'Rías Baixas de norte a sur', unha cata horizontal que percorreu as cinco subzonas da D.O. Rías Baixas. O 20 de agosto terá lugar a última actividade, 'O reto do sommelier', unha cata a cegas guiada por Jacobo Rivas.
Os viñedos do Castelo de Soutomaior, con catro hectáreas de extensión, foron plantados en 1984. Predomina a uva autóctona albariña, complementada con outras variedades brancas como godello, torrontés, loureiro e treixadura, e tintas como mencía e sousón.
