O Concello do Porriño deu o pistoletazo de saída ao novo Obradoiro de Emprego de Formación e Aprendizaxe denominado “O noso encontro co emprego II”. Esta iniciativa mixta de formación e emprego está orientada á titorización e inserción no mercado laboral de 16 mozos e mozas do municipio. Conta cun orzamento de 438.945,36 euros, cofinanciado pola Unión Europea e a Xunta de Galicia a través da liña Talento Mozo.
O acto inaugural estivo presidido polo alcalde do Porriño, Alejandro Lorenzo, quen felicitou aos seleccionados e os animou a aproveitar esta experiencia de 12 meses de contrato laboral remunerado e formación oficial. Lorenzo subliñou o alto volume de solicitudes recibidas e a agardada alta taxa de inserción laboral, dada a forte demanda das especialidades impartidas no contorno empresarial da comarca. Tamén agradeceu o apoio da Xunta de Galicia para impulsar estas oportunidades.
A delegada territorial da Xunta de Galicia, Anta Ortiz, destacou o valor do persoal docente e a importante saída laboral destas especialidades. Na xornada tamén estiveron presentes José Antonio Rodríguez Fachado, director territorial de Pontevedra da Consellería de Emprego, Comercio e Emigración, e a concelleira de Emprego do Porriño, Teresa Veloso.
Os propios alumnos e alumnas amosaron o seu optimismo. Na rama de administración, gravación e tratamento de datos, Andrei e Pablo destacaron o seu entusiasmo e o obxectivo de "optar a un posto de traballo". Iria manifestou sentirse "moi orgullosa de ter sido elixida" e confía en que lle abra portas a un bo futuro profesional, unha visión compartida por Silvia, enfocada en atención ao cliente, quen resaltou a utilidade práctica do contido.
A motivación é clave para todos. Javi valorou positivamente a "formación innovadora" para labores de pinche e cociñeiro, coa meta de dedicarse profesionalmente aos fogóns. Fran móstrase motivado coa perspectiva de acadar un emprego estable, mentres que Jaime, ilusionado por volver ás aulas, ambiciona "chegar a ser un bo executivo dunha empresa" no futuro.
