A conselleira de Vivenda e Planificación de Infraestruturas, María Martínez Allegue, fixo entrega das chaves dun inmoble rehabilitado no Casco Vello de Vigo. Este acto, segundo o Goberno galego, enmárcase na súa estratexia de ampliación do parque público de vivenda e forma parte do traballo do Consorcio Casco Vello.
O Consorcio Casco Vello, participado nun 90% pola Xunta e o 10% restante polo Concello de Vigo, leva dúas décadas rehabilitando inmobles no centro histórico. Desde a súa creación, adquiriu 93 edificios, dos cales 79 xa están rehabilitados, xerando 140 vivendas e 36 locais cun investimento superior aos 30 millóns de euros.
Ademais, a Xunta defende o seu “compromiso firme” coa vivenda en Vigo, destacando proxectos como as máis de 900 vivendas públicas en marcha en San Paio de Navia, con 309 xa en construción, e futuros desenvolvementos urbanísticos en Lavadores e Ramón Nieto que permitirán construír miles de vivendas protexidas.
“"A este ritmo, farían falta miles de anos para cubrir a demanda."
Pola súa banda, a concelleira de Urbanismo, María José Caride, cualificou de “ridícula” a celebración da entrega dunha única vivenda no ano 2026, nunha cidade onde máis de 10.000 persoas demandan vivenda protexida. Caride subliña que Vigo concentra aproximadamente un de cada tres solicitantes de vivenda protexida en Galicia, o que, ao seu xuízo, evidencia a insuficiencia das actuacións autonómicas.
As críticas do Concello tamén se centran no financiamento da rehabilitación, argumentando que non contou con investimento directo recente da Xunta, senón que se executou con fondos históricos achegados polo Consorcio durante o mandato do socialista Emilio Pérez Touriño. O Concello lembra ademais a súa participación no financiamento do organismo, un papel que, segundo afirma, adoita quedar en segundo plano.
