O inmoble, un chalé abandonado situado entre a avenida da Florida e a Praza da Miñoca, converteuse nos últimos meses nunha coñecida “narcocasa”. Esta situación provocou unha crecente preocupación entre os residentes da zona, especialmente pola súa proximidade a un colexio e unha gardería, o que incrementou a sensación de inseguridade.
A intervención policial produciuse arredor das seis da mañá, cando os axentes accederon ao interior da vivenda para desaloxar ás persoas que alí se atopaban, moitas delas consumidoras habituais. Durante a operación, foron detidas dúas persoas, presuntamente encargadas da distribución das substancias estupefacientes.
Os veciños levaban tempo alertando da situación. Denunciaban un constante trasfego de persoas e un aumento de episodios de inseguridade vinculados ao consumo de drogas na contorna.
Ante a falta de solucións, os residentes da zona chegaron a organizar unha recollida de sinaturas para reclamar o derrubamento do inmoble. Tras a actuación, a Policía procedeu a precintar a vivenda, mentres continúa o rexistro do interior en busca de máis probas relacionadas coa actividade delituosa. A investigación segue aberta e non se descartan novas detencións.
